Diskursu Presidente AETL iha komemorasaun Loron AETL nian 16 de Agosto 2016

Uluk Nanain mai ida hasa’e ita Agradese wain ba Aman Maromak tamba hodi grasa tomak ohin ita bele hasoru malu iha fatin ida ne’e.

Nune'e mos mai ita hasa’e ita nia honra no respeitu tomak ba heroi libertasaun Nasional espesial enfermeiros sira ne’ebe mate durante funu ba libertasaun nasional nune'e mos sira ne’ebe mate tamba ezerse sira nian knár no balu tamba moras.

Associação dos Enfermeiros de Timor-Leste nudar Assosiasaun profesionais da Saúde ne’ebe historikamente existe hahu iha data 16 de Agustu tinan 2000, Assosiasaun ida ne’ebe moris iha situasaun defisil ho naran East-Timor Nurse Association(ETNA)

Iha tinan 2000 profesionais enfermajem iha Timor-Leste  buka halibur an liu husi ETNA, hodi halibur idea, haforsa no habo’ot Servisu hodi oinsa atu konstrui Servisu Nasional da Saúde hamutuk ho profisionais da Saúde sira seluk. Ohin loron Ministério da Saúde sai forte no boot, sura mos kontribuisaun enfermeiros lubuk ida, ne’ebe mak balu ohin loron sei eziste hela maibe, sira balu ohin loron reforma dadauk ona, sira balu ohin loron lahamutuk ona ho ita maibe sura ho sira nia kontribuisaun, ohin loron Ministerio da Saúde bele forsa hahu husi fatuk kuak, dolok kuak mai to’o iha vila, funsionamento assistensia da saúde bele la’o no buras ba bebeik tantu iha situasaun defisil kai ha situasaun normal. Ida hatudu nanis ona iha tinan 1975, 1999 nune'e iha tinan 2006; instituisaun sira bele namkari, maibe profesionais da Saúde firmi nafatin,

Ohin loron profesionais da Saúde sira komesa buras ba bebeik, profesionais da Saúde sira komesa nakonu ba bebeik, iha teritorio nasional. Ohin loron ema komesa temi profesionais da Saúde ida ne’e ka ida ne’ebá. ohin loron ema barak komesa temi assistensia Saúde ladiak sempre liga ho atendimentu enfermeiros sira nian. Ohin loron mos ema barak komesa hare no kritika profesionais da Saúde sira nia atendimentu.

Maibe iha momentu ida ne’e, momentu ida ne’ebe ita hotu hein ho esperansa tomak katak atendimentu iha sistema nasional da Saúde tenki ho kualidade efisiensia e efikas. Atendimentu ida ne’ebe mak  ema barak  ho esperansa, atu bele enfermeiros sira fo atendimentu ne’ebe los, mos, no imparsialidade hodi lahare ba rasa, kor no relijiaun ka politika. Ohin loron ema hotu nia esperansa atu enfermeiros nia presensa  besik liu tan ba iha komunidade, ba familia no individu iha teritorio nasional  tantu iha seitor publika ka iha seitor privada sira.

Presensa enfermeiros sira nian, ema hotu iha esperansa, atu bele lori fuan hakmatek nian, fuan ksolok nian hodi habo’ot no rekopera sira ne’ebe físikamente fraku(moras) nune'e mos  fo korazem ba sira ne’ebe fraku iha vida spiritual.

Esperansa bo’ot sira ne’ebe mak ema hotu hein, ohin loron hakarak buat ne’ebe diak. Maibe atu relembra hikas katak hahu (loron 21 fulan setembro 1914-2016) tinan 102 liu ba povu Timor-Leste komesa ona hetan assistensia enfermajem  mesmu iha situasaun defisil no  la kobre hotu populasaun em jeral maibe presensa enfermeiros sira nian iha komunidade hahu kedas husi ne’ebá.

Relembra hikas iha tinan 1999, entre periodu defisil setembro ba to’o outubro instituisaun sira tomak iha Timor-Leste aleiza total professional Saúde sira mos maioria abandona Hospitais sira hodi salva sira nia vida. Maibe profesionais da Saúde lubuk oan ida iha momentu ne’eba sira firmi iha RSUP Bidau toko Baru, ohin loron Hospital Nasional Guido Valadares, sira nafatin halibur maluk sira ne’ebe iha kondisaun fraku, moras toba lekar hela enfermaria no balu nafatin lori mai husi.  Enfermeiros sira ho nia Aten brani nafatin fo sira nia assistensia da Saúde ka tratamentu ba moras sira; iha momentu da ne’eba sira halo knár nudar enfermeiros, nudar Mediku, nudar parteiras nudar farmasista nudar mos nutrisionista. Maibe ohin loron sira mak nafatin nune'e, enfermeiro. Ida ne’e mak profesionais da enfermajem. Sira dala balu hanesan hela ita sira ne’e, maibe iha Komemorasaun loron enfermeiros ida ne’e Ami estrutura ho fuan no laran hamutuk nafatin ho imi no hamutuk nafatin ita sei hakat ba oin. Laiha historiador sira mak ohin atu buka tuir atu oinsa bele hakerek netik imi nia memoria ida ne’e, inklui mos AETL, maibe ami prometa katak AETL liu husi estrutura periodu tinan 2015-2020 sei esforsu hodi hakerek netik memoria espesial ida ne’ebe ita boot sira halo ona iha tinan 1999

 Historikamente Iha situasaun defisil ema barak tau esperansa mos ba iha papel enfermeiros sira nian, iha tinan 1942 tuir istoria enfermeiros Timor-Leste hatudu dadauk ninian ezistensia iha funu mundial daruak nian. Istoria mos haktuir tan katak iha situasaun defisil enfermeiros sira mos hatudu nian papel iha vila ka iha ailaran. Iha tinan 1975 papel enfermeiros sira nian mos sai hanesan fátor prinsipal ba iha kontribuisaun prosesu luta Libertasaun Nasional. Nune'e iha biban ida ne’e enfermeiros Timor-Leste hato’o  honra ba asuwain Enfermeiros Guido Valadares ho enfermeiros sira seluk ne’ebe kontribui ba funda Nasaun doben Republika Democratica de Timor-Leste(RDTL) iha tinan 1975  mai to’o iha tinan 1999. Balu mate inklui mos enfermeiro Guido Valadares, nune'e sobreviventes sira seluk ne’ebe balu to’o ohin loron sei moris, balu hahu ona deskansa maibe balu nafatin ezerse sira nia knár murak ida ne’e.  Imi nia esperansa iha momentu ida ne’eba, nudar mos inspirasaun ba ami ne’ebe ohin atu kontinua lori servisu enfermajem ba oin atu hadiak, haburas no hametin liu husi dezenvolve Siensias enfermajem(Teoria, pratika, Peskiza  enfermajem) hanesan prevensaun, promosaun, kurativu, e reabilitasaun.

Ohin loron bainhira  ita atu hakat ba oin saida mak ita presisa atu hare bainhira ita dezenvolve profisaun Saúde. Iha situasaun defisil ema barak tau neon ba enfermeiros sira. Maibe prosesu tomak la’o ita nia observasaun jeral hare katak enfermeiros sira marka pasu iha fatin, ho nia nivel edukasaun ne’ebe baixa(Minim) maibe iha parte ida komunidade ejije kualidade mak bo’ot tebes.

Ba future pozisaun AETL nudar sumbrinha ba nia membros sira hotu buka atu hare no luta konabá bens star membros sira nian, pozisaun AETL atu hare konaba siguransa de servisu, ho fasilidades siguransa de servisu enfermeiros sira bele garante siguransa de atendimentu ba pasiente sira, nune'e mos siguru ba nian an rasik. Ohin entidades sira ne’ebe utiliza profesionais da enfermajem nian iha Timor-Leste seidauk tau atensaun ba siguransa de servisu, dala barak enfermeiros sira keixa konaba falta de ekipamentus protésaun pessoal (Personal Protection Equipment-PPE). Infraestrura, be mos, no fasilidades seluk hanesan uma liliu sira ne’ebe ezerse sira nia knár iha area remotas ne’ebe laiha estrada, dala barak sira tenki utiliza deit fasilidade alternativas. Dala barak profesionais da Saúde tenki la’o ain, dala ruma mos distansia ne’ebe mak dok tebes hodi preujudika atendiementu sira ba komunidade.

Iha parte seluk mos dala barak ema interpreta ejijensia barak ne’ebe mak enfermeiros sira ejije barak liu hare ba salario-subsidial. Maibe iha biban ida ne’e AETL hato’o nia pozisaun katak la’os salario deit mak AETL foti sai hanesan desafius, maibe fátor barak mak kontribui hela ba resultadu asistensia enfermajem ne’ebe ladun diak nian mak hanesan tuir mai ne’e:

1.       To’o ohin loron politika governo nian liu husi Ministério da saude, AETL hare katak seidauk iha politika ida ne’ebe mak diak hodi bele fasilita enfermeiros sira ezerse nian funsaun, laiha standarizasaun ba dokumentasaun enfermajem tantu iha nivel Saúde komunitaria nune'e mos iha nivel hospitalar nian, exemplo: durante ne’e AETL seidauk hare diresaun ida ne’ebe los iha nivel Ministério da Saúde mak atu dezenvolve padraun sira tratamentu enfermajem nian, dokumentasaun enfermajem nian, nune'e mos laiha avaliasaun servisu enfermajem nian iha nivel Saúde Komunitaria ka nivel hospitalar. Ita seidauk iha politika ida, atu Ministério da Saúde fo atensaun prioritario assistensia profesionais Saúde. Ita seidauk hare semak atu hahu ida ne’e, ami sente preukupadu no sai hanesan kestaun ida ba ami tamba sa iha nivel Ministério da Saúde produtividade ba iha servisu centrais la tau prioridades ba asunto ne’e, durante tinan 10 resin ona ita seidauk hare dokumentu official hira mak Ministério da Saúde produs ona, liga ba Padraun assistensia enfermajem.

2.       Hahu tinan 2014 AETL apoiu ona Ministério da Saúde hodi dezenvolve Kodigu etika/Odontolojia, standar prátika enfermajem no Standar Kompetensia enfermeiros, maibe prosesu ida ne’e mesmu iha progresu maibe la’o kleur oituan. Ejijensia AETL nian mak atu bele halais prosesu ida ne’e hodi bele hetan finalizasaun ka aprovasaun final. Tamba ho aprovasaun dokumentu tolu ne'e nudar pasu inisial ida hodi bele hakat ba pasu sira seluk hanesan temi iha leten. AETL iha komitmentu atu apoiu Ministério da Saúde liu husi programa sosializasaun dokumentu sira ne’e ba iha maluk enfermeiros sira iha baze..

Prosesu sira ne’ebe mak Ami temi iha leten bainhira hetan aprovasaun mak sei faze kontinuasaun hanesan dezenvolve Padraun operasional kliniku enfermajem nian baseia ba standarte jeral ne’ebe ita prepara dadauk ne’e. No kontinua apoiu hodi halo penjabaran ka dezenvolve liu tan kontinuasaun husi standar pratika enfermajem no standar kompetensia hanesan asistensia enfermajem/asuhan keperawatan tuir kazu;

Momentu ida ne’e presiza dadauk ona padraun sira enfermajem nian baseia diánostiku enfermajem nune'e uniformizasaun dokumentasaun/Pencatatan keperawatan. No prinsipal liu dokumentasaun enfermajem nian atu sai hanesan dokumentu official nune'e mos bele halo avaliasaun enfermajem, avaliasaun dezenpeñu ida ne’e baseia ba meritu ema ida-idak nian.

To’o ohin loron tinan sanulunu resin rua(12) ona enfermeiros sira hein hela ho tempu naruk no laiha serteza ba desisaun ida ne’ebe firmi atu bele lori Enfermeiros sira ne’ebe ho nivel edukasaun SPK ba minimu diploma III, susar tebes. Maibe iha parte seluk ema ejije kualidade servisu maibe nivel kuñesimentu ne’ebe mak iha basiku tebes. Ho situasaun ohin loron nian ne’ebe mak laiha desisaun politika ida ne’ebe mak klaru enfermeiros barak mak hasai ona nia edukasaun iha Saúde publika. Maibe ami konsiente katak ne’e halai ses ona husi siensias da enfermajem, oinsa mak ita bele asegura katak kualidade enfermajem bele la’o ho diak.

Politika formasaun Enfermajem lahetan atensaun seriu husi servisu nasional da Saúde sira, tamba to’o ohin loron kumprimentu Ministério da Saúde nian baseia ba;

“Decreto-Lei n.º 14/2004 de 1 de Setembro EXERCÍCIO DAS PROFISSÕES DA SAÚDE alteradu ho DECRETO-LEI N.º 40/2011de 21 de Setembro Sobre o Exercício das Profissões da Saúde. Artigo 3 alinea c: Enfermeiros - são profissionais de saude licenciados, bacharéis ou técnicos profissionais em enfermegem, habilitados a exercer a enfermagem geral ou suas especialidades.

AETL rekuñese katak haruka dadauk ona enfermeiros balu ba kontinua estudo iha rai liur, maibe enfermeiros barak mak seidauk hetan opurtunidade oinsa mak atu bele hatán ba dekreto lei ne’ebe temi iha leten. AETL hare mos katak horas ne’e enfermeiros barak mak hasai ona sira nia nivel edukasaun Saúde publika, nune’e bainhira aplikasaun Standar ne’ebe lolos mak sei bele iha krize enfermajem iha Timor-Leste; nomos preukupasaun AETL nian mak ne’e oinsa mak atu bele eleva kualidade assistensia enfermajem ba future iha Timor-Leste?

Tamba prosesu estabelesimentu padraun ba servisu enfermajem nasional sai hanesan ejijensia prinsipal, nune'e to’o ohin loron AETL seidauk hare hetan diresaun ida ne’ebe mak klaru atu oinsa bele estabelese padraun nasional ba assistensia enfermajem, ami nia rekomendasaun atu;

a.       Define padraun de jestaun hospitais de servisu nasional de Saúde no pakote basiku de kuidadus hospitalares. 

b.       Define politika regulamentar e monitorizar programa espesifikus ba area hospitais

c.       Monitoriza kumprimentu dos normas ba prestasaun kuidadus hospitais iha servisu nasional da Saúde;

d.       Dezenvolve no garantia implementasaun politikas konstrusaun no manutensaun, instalasaun teknikas  hospitais  hanesan regulamentasaun, monitorizasaun no kordenasaun ba intervensaun  nian;

e.       Dezenvolve Aprovasaun no desiminasaun protokolos e Manuais teknikus klinikus instituisaun seidauk hatudu progresu ida ne’ebe diak;

f.        Laiha progressu konabá Aprova no monitoriza implementasaun  dos kodigus deontolojikus ba profesionais da Saúde;

g.       Seidauk insentiva estabelesimentu komisaun de etika iha servisu ba prestasaun da Saúde;

h.       Politika estabelesimentu konsellu disiplina das profisionais da Saúde no funsaun averiguasaun;

Ita hare katak bainhira funsionamento funsaun prinsipal sira iha Ministério da Saúde atu bele atinji pre-ukupasaun ne’ebe mak ami mensiona iha leten, presiza konsidera katak kolokasaun profesionais  Saúde iha servisu Centrais mos importante tebes atu avalia hikas, hodi koloka ema profesionais da Saúde kada diresaun hodi haforsa no halais politika ne’ebe esbelese ona.

1.       Politika Rekursus Humanus(RH)

Politika formasaun ba enfermeiros sira iha servisu nasional da Saúde to’o ohin loron seidauk la’o ho diak, ne’e tamba ita seidauk hare hetan ba definisaun kompetensia enfermeiros tuir grau edukasaun no espesialidade; nivel edukasaun Bacherelato, Licensiatura, Mestradu no Doutoramento enfermajem iha area espesifiku. Ho nivel edukasaun Sistema enfermajem iha nia grau de kompetensia, politika rekursus umanus presiza hare hetan konaba nivel hospitais presiza enfermeiros tekniku(Baxarel) lincensiatura, Mestradu ka Doutoramentu hira? nune'e mos iha nivel Saúde komunitario.  Ohin loron ita seidauk utiliza didiak rekursu humanus ne’ebe Governo haruka ba kontinua sira nia estudo, observasaun ne’ebe mak ita hare katak bainhira enfermeiros ida fila mai husi nia estudo, ita so halo deit ordem de reativasaun servisu, maibe laiha politika de avaliasaun ida ne’ebe tenki halo hodi konsidera no oferese ba enfermeiros sira ne’ebe mai ho nivel edukasaun aumenta ás liu tan, ho termu de referensia ida ne’ebe espesifiku tuir nivel edukasaun ne’ebe mak iha.

Politika formasaun mos seidauk reforsa ba iha ójetivu de formasaun enfermajem tamba ita rasik seidauk iha politika atu forma enfermeiros espesialista exemplo; enfermeiros espesialista iha area emerjensia, kuidadus intensive (ICU) Neonatoljia, pediatria, Cirurjia, no espesialidade sira seluk tan. 

Buat sira ne’e hotu, iha ójetivu ida deit mak atu garantia kualidade asistensia enfermajem, no kualidade assistensia enfermajem e kualidade etika enfermajem labele mai derepenti deit sem iha formasaun kontiñu, formasaun kontinua mak bele forma ema sai maduro no kuñese diak liu tan profisaun ne’ebe tula hela ba nia kbás. dala barak ita kestiona konaba hahalok sira ne’e hotu maibe presiza mos iha balansu interpretasaun katak ema ne’e nivel de kunesimentu to’o iha ne’ebe.

Nune'e mos politika formasaun da Saúde mos presiza tau konsiderasaun no tratamentu igual entre profesionais da Saúde sira hotu. Bainhira profesionais da Saúde sira hetan formasaun presiza prepara politika enkuadramentu ne’ebe mos hanesan. Ami rekuñese katak politika enkuadramentu liu husi rekrutamentu ba vagas sira, maibe tamba sa iha profisaun balu bainhira fila mai hetan kedas prosesu enkuadramentu maibe iha profesionais balu laiha.

Isu ida seluk ne’ebe mak sai hanesan preukupasaun AETL nian mak politika enkuadramentu husi rezime kareiras jeral ba Rezime kareiras espesial iha tinan 2012 kria hela problema bo’ot ida ne’ebe tau todan deit ba iha profisionais da Saúde sira. Enkuadramentu Grau eskalaun ne’ebe sala, ikus mai ita tau todan ba profionais da Saúde tenki devolve hikas salario ne’ebe mak sira simu. Servisu rekursus humanus tenki hare hikas no konsiente katak dala balu ita mos halo sala ba prosesu enkuadramentu ne’e, maibe politika ida ne’ebe hasai hodi ko’a salario, ida ne’e nudar representante Enfermeiros tomak lamentavel tebes. Tamba sa mak labele halo ajustamentu deit? Tamba ami konsiente katak enkudramento ne’e la’os sira nia sala maibe prosesu enkuadramentu sira mak karik seidauk los. Tamba ne’e rekomenda ba iha Ministério da Saúde:

a)       Atu halo prosesu ajustamentu salarial tuir direitu ne’ebe preve iha lei, maibe labele obriga hodi husu enfermeiros sira hodi seluk hikas ba erru ne’ebe dala ruma instituisaun mak halo sala;

b)       Atu hapara ona ko’a salario ba enfermeiros ka profesionais da Saúde sira ne’ebe karik iha prosesu enkudramentu tinan 2012 sala no bele halo deit ajustamentu salario hanesan hatun ka hasa’e;

c)       Ministério da Saúde presiza halo avaliasaun urjenti ba implementasaun rezime careiras espesial; hanesan re-verifikasaun no rekolokasaun lolos tuir kompetesia profesional ba enkuadramentu tinan 2012. No halo republikasaun ba prosesu ajustamentu sira iha jounal da republika;

d)       Halo prosesu enkuadramentu internal no fo ordem de servisu ba enfermeiros sira tuir nivel kompetensia edukasaun enfermajem bainhira sira fila husi Estudo; presiza revé hikas politika rekolokasaun enfermeiros sira bazeia ba nivel edukasaun;

e)       Presiza koloka representate multi profesionais da Saúde sira iha area rekursus humanus Ministerio da Saude(MdS)  hodi halo provisaun no analiza funsional tuir profesionais idaidak nia nessesidades; halo provisaun ba politika formasaun nune'e mos politika rekrutamentu e kolokasaun pessoal;

2.       Presiza haforsa ema profesionais da Saúde sira iha area servisu hospitalar nune'e mos iha Gabinete Garantia kualidade servisu hodi nune'e bele ezekuta mandatu servisu centrais Ministério da Saúde nian ne’ebe temi iha decreto lei no 21/2015; konabá organica do Ministério da Saúde. Tamba ikus mai Funsionamentu servisu hospitais sira iha base nune'e mos Saúde komunitario nessesita mos presenti padraun klinika sira. Atu halo ida ne’e karik iha nivel nasional presiza haforsa liu husi kolokasaun ema profesionais da Saúde.

3.       Ejije atu bele realiza formasaun ba enfermeiros SPK ba minimu nivel Diploma 3 tuir “Decreto-Lei n.º 14/2004 de 1 de Setembro EXERCÍCIO DAS PROFISSÕES DA SAÚDE alteradu ho DECRETO-LEI N.º 40/2011 de 21 de Setembro Sobre o Exercício das Profissões da Saúde artigo 3 alinea c haruka.

4.       Governo liu husi Ministério da Saúde presisa tau konsiderasaun ba kontribuisaun enfermeiros sira iha prosesu dezenvolvimentu Nasional da Saúde hodi hili loron Nasional ida ba enfermeiros sira nune’e kada tinan enfermeiros sira bele komemora hodi halo reflesaun ba sira nia servisu durante tinan tomak nune’e mos hodi bele hanoin hikas maluk enfermeiros sira ne’ebe mak fila ona ba mundo seluk tamba sira ezerse sira nia knar enfermajem durante moris.

AETL hare kada tinan Ministerio da Saúde sempre komemora loron mundial sira hanesan loron mundial da Saúde, Moras, Moras Malaria, TBC nsst. Maibe ba profisionais da Saúde ida ne’ebe mak ezerse sira nia knár profesionais ita laiha momentu ruma atu haksolok ho sira hodi halo reflesaun, avaliasaun.

-          AETL sujere atu konsidera data 16 de Agustu nudar loron Nasional enfermeiros nian tamba iha loron espesial ida ne’e, enfermeiros Senior sira reuni hodi unifika komitmentu ba kontribuisaun harí ka konstrui Servisu Nasionais da Saúde Timor-Leste hamutuk ho Profesionas da Saúde sira seluk. Liu husi sorumotu 16 de agustu nia enfermeiros sira halibur malu hodi organiza liu husi East Timor Nurse Association hodi halibur ideas oinsa atu kontribui.  No ohin loron ita tenki rekuñese mos katak ho kontribuisaun enfermeiros sira nian mos konsegue hari airin ida ne’ebe mak metin, mak Ministério da Saúde no enfermeiros sira mak nudar koluna vertebra Ministério da Saúde nian.

-          AETL sujere mos alternative seluk karik bele konsidera loron mate heroi da patria Nasional nian ne’ebe iha tinan 1975 prosesu hari Nasaun RDTL enfermeiro ida ne’ebe nudar mos lideransa Nasional ida ne’ebe tur iha Estrutura Governo 1975 nian mak Enfermeiro Guido Valadares, nudar loron Nasional nia ba Enfermeiro.

Ami konsiente katak durante ne’e Governo liu husi Ministério da Saúde utiliza profesionais da Saúde sira maibe ita laiha momentu espesial ida atu hamutuk ho sira. Nune’e karik ami nia proposta ida ne’e pertinente duni, no karik VI Governo konstituisional konsegue halo ida ne’e, nudar honra no previlejiu boot ida ba istoria ukun nian iha momentu ida ne’e.

Karos kolegas enfermeiros tomak,

Ohin loron mos AETL hakarak marka istoria ida katak hahu ohin loron AETL sei halo prosesu rejistrasaun iha teritorio Nasional tomak,

Ikus liu ba maluk enfermeiros tomak iha teriotrio Nasional nudar representante imi nian iha AETL ami husu atu ita ho ita kapasidade tomak fo ita nia kontribusaun liu husi assistensia da Enfermajem hahu husi Fatuk kuak e Dolok kuak sira mai to’o iha Nasional no nafatin haktuir liafuan murak ne’ebe husik hela husi ita nian Matebian enfermeiro Jose Paixao ; liu husi Marsa AETL ne’ebe mak dehan:

“Enfermeiros Timor Loro sa’e, Hamrik halo imi knár, Timor oan kaer liman hamutuk hari’i ita nasaun, Lorosa’e, loro monu, rai Timor ninia Isin diak no forte matenek rai Timor;

Enfermeiros Timor Lorosa’e, Simu no tula iha ita kba’as, Knár domin tulun ema moras, Isin diak povu Timor Lorosa’e”

Obrigado

Presidente Associação dos Enfermeiros de Timor-Leste (AETL)

Enf Joaquim Gregorio de Carvalho,Skep,